وزیر خارجہ شاہ محمود قریشی نے دوشنبے میں شنگھائی تعاون تنظیم کی وزرائے خارجہ کونسل میں شریک دیگر وزرائے خارجہ کے ہمراہ تاجکستان کے صدر امام علی رحمان سے ملاقات کی۔
اس موقع پر تاجک صدر نے وزرائے خارجہ اور وفود کے سربراہان کو تاجکستان آمد پر خوش آمدید کہا۔ وزیر خارجہ نے شنگھائی تعاون تنظیم کی وزرائے خارجہ کونسل کے اجلاس کے انعقاد اور عمدہ میزبانی پر تاجک صدر سے اظہار تشکر کیا۔ انہوں نے تاجک صدر کو صدر پاکستان ڈاکٹر عارف علوی ،وزیر اعظم عمران خان اور پاکستانی عوام کی جانب سے نیک خواہشات کا پیغام بھی پہنچایا۔ شاہ محمود قریشی نے کہا کہ تاجک صدرکے دورہ ء پاکستان سے دونوں ممالک کے مابین دو طرفہ تعلقات مزید مستحکم ہوئے۔انہوں نے کہا کہ پاکستان اور تاجکستان میں تاریخی برادرانہ تعلقات ہیں۔تاجکستان کے ساتھ دو طرفہ تعلقات کو مزید مستحکم بنانے کے لیے پر عزم ہیں۔ انہوں نے کہا کہ تاجکستان کے ساتھ، تعلیم، ہاؤسنگ، انفراسٹرکچر ، ٹیکنالوجی اور توانائی کے شعبوں میں تعاون کا فروغ چاہتےہیں۔کاسا منصوبوں کی بروقت تکمیل توانائی راہداری کے قیام میں مددگار ثابت ہوگی ۔ شاہ محمود قریشی نے تاجک صدر کو افغانستان میں قیام امن کیلئے پاکستان کی مصالحانہ کوششوں سے بھی آگاہ کیا۔